講講爺

去到呢度阿爺又去到新篇章（即係其實佢人生就無分嘅，只係我夾硬幫佢分左） 突然想講下阿爺臨走嘅時間 佢到老時已經體力好弱，因為佢肺係有啲事，基本上行一段路都抖番兩三次 屋企有張類似太師椅嘅櫈，咁當然佢就唔會食大煙咁串，可能都係坐下睇下電視咁，有人入門口佢就嗯一聲就算 我阿嫲呢家都仲好健康，我記得我細個見佢食完飯，有時坐喺窗邊，佢有一罐類似藍罐曲奇咁嘅野，入面全部都係煙絲，佢會拎煙枝捲煙食，望住窗口好似諗好多野咁 我阿爺係肺病走，嗰時驚佢隨時走仲話要搞啲囍事沖喜下，當然最後都係搞唔切佢就走左 然後我阿嫲以前會拎本相簿，講下阿爺嘅野我聽，我知道喺佢個世界，阿爺係一個英雄 至於有無人記得阿爺，其實我估都有嘅，最少我喺網上都搵到人提佢個阿，不過唔多資料，可能23 條後好快都會灰飛煙滅 阿爺葬喺慈雲山，每年我都會探佢，以前阿嫲仲對腳有力行得走得時都會去，我拜佢嗰陣，阿嫲就會講：咁鬼耐一早投左胎囉 阿爺，我估你啲兄弟同仇家都走晒 有啲早死有啲遲走，最後你地呢班人留低左啲咩？ 你話出嚟行唔應該係咁 咁應該係點？ 有時唔係出唔出嚟行，係做人應該點做 阿爺，你教我好無